Is amhránaí sean-nóis í Máire Ní Chéileachair a rugadh agus a tógadh ar an bhFearann i gCo. Chorcaí agus is ó Chill na Martra i nGaeltacht Mhúscraí dá muintir roimpi. Bhí sí mar amhránaí cónaitheach i nGaeltacht Mhúscraí sa bhliain 2000-2001 agus b’í an chéad stiúrthóir í ar Scéim Aisling Gheal – Scéim Forbartha Amhránaíochta Mhúscraí. Tá blianta caite aici i mbun ranganna do aos óg Mhúscraí ó shin.

Tá mórán duaiseanna bainte amach aici féin ag Fleadhanna Ceoil agus ag Oireachtas na Gaeilge. Bhuaigh sí Corn Uí Riada, príomhchomórtas amhránaíochta ar an sean-nós sa bhliain 2018. Bronnadh Gradam Ceoil TG4 Amhránaí na Bliana uirthi sa bhliain 2018 chomh maith. Tá cúig bliana déag caite aici ag múineadh sean-nóis i gColáiste na hOllscoile, Corcaigh. Is minic í páirteach i bhféilte ceoil agus amhránaíochta ar fuaid na tíre agus thar lear. Is ball í de Acadamh Fódhla i Múscraí agus de Chlub Amhránaithe Chorcaí atá lonnaithe sa chathair.

Tá dhá dhlúthdhiosca eisithe aici – “Guth ar fán” 1999 agus “Ceantar Glas Mhúscraí” 2018.